O proxecto Highlands.3 está a desenvolverse desde comezos de 2020 até agosto de 2025, co obxectivo de contribuír á investigación e á innovación no ámbito do desenvolvemento sustentábel das áreas de montaña. Financiado pola Comisión Europea, implica máis de corenta institucións, tanto académicas como non universitarias, de dentro e fóra da Unión Europea.
Unha equipa de xeógrafos da Universidade de Santiago de Compostela participou como un dos parceiros máis activos na execución do proxecto. Implantouse mediante ao redor de 500 estadías dun mes de duración de investigadores e investigadoras das institucións participantes, durante as cales estiveron a traballar noutras entidades da rede. Máis de 30 desas estadías leváronse a cabo por parte da equipa do Departamento de Xeografía da universidade compostelá.
Con oito sesións colectivas ao longo deste lustro, a última, que serve como evento de peche do proxecto, está a ter lugar entre Galiza e Portugal na segunda metade de xuño e primeira metade de xullo de 2025. As primeiras xornadas deste mes de peche foron na Facultade de Xeografía e Historia os días 16 e 17 de xuño, e posteriormente desenvolveuse traballo de campo nas Montañas de Trevinca, tal como recolleu a prensa local en «La Región», «O Sil» ou «Somos Comarca».
Valerià Paül